ՀօԹ առաջնորդության ծրագիր HoT Ակադեմիայի շրջանավարտների համար
Ի՞նչ է ՀօԹ առաջնորդության ծրագիրը՝
Սա ՀօԹ համայնքի խորհրդի կողմից նախաձեռնած ծրագիր է ՀօԹ Ակադեմիայի շրջանավարտների համար։ Այն նպատակ ունի ներգրավել շրջանավարտներին Վիրտուալ քոլեջ 2026 շրջափուլի աշխատանքներում, նպաստել նրանց առաջնորդության և թիմային ղեկավարման հմտությունների զարգացմանը, և նրանց օգնությամբ բարելավել նոր կրթական ծրագրերի մասնակիցների փորձառությունը։ՀօԹ առաջնորդության ծրագրի մասնակիցները՝ ՀօԹ ուղեկիցները, յուրաքանչյուր նախագծի 5 շաբաթների ընթացքում կառաջնորդեն մասնակիցների խմբերը և կկազմակերպեն շաբաթական 2 խմբային առցանց հանդիպում։ Նրանց դերը ներառում է խմբային աշխատանքների գործընթացի համակարգումը, մասնակիցների հավասար ներգրավվածության խթանումը առցանց դասերին, խմբի չատի կոորդինացիան, ինչպես նաև խմբակիցներից յուրաքանչյուրի մասին ակտիվության գնահատման թերթիկի լրացումը:
Ո՞վ կարող է դիմել՝
- ՀօԹ Ակադեմիայի բոլոր տարիների շրջանավարտները
Ի՞նչ հմտություններ պետք է ունենա ուղեկիցը՝
- հաղորդակցման, ապրումակցման հմտություններ,
- թիմային աշխատանքի պատրաստակամություն,
- բարձր պատասխանատվություն։
Ինչպիսի՞ ժամային ներգրավածություն է ակնկալվում՝
- Ընդհանուր հասանելիություն նախագծերի իրականացման ընթացքում՝ մայիսից օգոստոս
- Տրամադրել շաբաթական ընդհանուր մինչև 10 ժամ, որոնցից միայն առցանց հանդիպումների համար ֆիքսված՝ շաբաթական 2 ժամ։
Որո՞նք են ուղեկիցների պարտականությունները՝
- Մասնակցություն ուղեկիցների համար նախատեսված սեմինարին
- Ծանոթություն թիմի կողմից տրամադրված ուղեցույցներին և դրանց կիրառություն աշխատանքում,
- Վիրտուալ քոլեջի մոդուլների խմբային աշխատանքների կազմակերպում և առաջնորդում, խմբային չատերի համակարգում
- Վերջնաժամկետների մասին հիշեցումների և դասընթացների հետ կապված նորությունների տեղեկացում խմբային չատերում
- Առցանց հանդիպումների քննարկումների ֆասիլիտացիա/ուղղորդում և խմբակիցների հավասար մասնակցության խթանում
- Տեխնիկական/բովանդակային/վարքային խնդիրների վերհանում և տեղեկացում թիմին
- Մասնակիցների ակտիվության թերթիկների լրացում
- Հետադարձ կապի պահպանում ծրագրի շարունակական բարելավման նպատակով
Ի՞նչ հնարավորություններ են ստանում ուղեկիցները՝
- Հեռավար աշխատանք, հիմնականում ճկուն ժամեր
- Անվճար հասանելիություն նոր կրթաշրջանի Վիրտուալ քոլեջի կրթական բովանդակությանը
- ՀօԹ ուղեկցի հավաստագիր
- Հնարավորություն անդամակցելու ՀօԹ համայնքի խորհրդին
- Հոնորար՝ մինչև 52,500 դրամ (հարկերը ներառյալ), յուրաքանչյուր 5 շաբաթյա նախագծի համար:
Սիրելի՜ ՀոԹեցի, եթե ցանկանում ես ձեռք բերել առաջնորդության փորձ և զարգացնել քո թիմային ղեկավարման և ֆասիլիտացիոն հմտությունները, ակտիվ դեր ստանձնել ՀօԹ Ակադեմիայի աշխատանքներում և ունենալ մեծ ներդրում ուսանողների կրթական հաջողությունների մեջ՝ լրացրու ստորև հայտադիմումը մինչև մարտի 20, 23:59։
Վիրտուալ քոլեջ 2026. երեք առաջնորդության նախագծեր
Առաջնորդության ծրագիրը բաղկացած է մի քանի առաջնորդության նախագծերից:Այժմ մեկնարկում ենք ՀոԹ Ակադեմիայի երկրորդ կրթաշրջանի առաջին կրթական ծրագրի՝ Վիրտուալ քոլեջ 2026ի երեք առաջնորդության նախագծերի ՀոԹ ուղեկիցների հավաքագրումը:
Վիրտուալ Քոլեջ 2026ի ընդունելությունը հայտարարվելու է մարտի 23-ին: Նախատեսվում է երկփուլանի ընտրության միջոցով ընդունել 180 մասնակիցներին հետևյալ մարզերից՝ Սյունիք, Շիրակ, Կոտայք, Արմավիր, Արարատ և Երևան:
Մասնակիցների ընտրությունը իրականացվելու է Վիրտուալ քոլեջի թիմի և ՀօԹ խորհրդի կողմից: Բոլոր այն մասնակիցներին, ում կընտրի ՀոԹ համայնքի խորհուրդը, տրամադրվելու է 100% կրթաթոշակ և նրանց ուսուցումը կլինի անվճար:
Դասերը մեկնարկվելու է մայիսի 4-ից, տևելու են 15 շաբաթ, դասընթացներն անցկացվելու են 3 փուլով:
Վիրտուալ քոլեջ 2026-ի յուրաքանչյուր փուլ իրենից ներկայացնում է առանձին Առաջնորդության նախագիծ:
Փուլ 1. Միաժամանակ Թվային և Իրավական գրագիտության մոդուլների իրականացում - 5 շաբաթ (մայիս - հունիս),
Փուլ 2. Միաժամանակ Հաղորդակցման և Ֆինանսական գրագիտության մոդուլների իրականացում - 5 շաբաթ (հունիս - հուլիս)
Փուլ 3. Ավարտական գործնական նախագծի իրականացում - 5 շաբաթ (հուլիս - օգոստոս).
Ավարտական միջոցառումը նախատեսվում է կազմակերպել սեպտեմբերի 19-ին Երևանում:
Վիրտուալ քոլեջ 2026-ի ընթացքում յուրաքանչյուր դասընթացի դասավանդումը ունենալու է հետևյալ կառուցվածքը՝
- Յուրաքանչյուր շաբաթ նախապես ձայնագրված կրթական տեսանյութերի և գնահատվող հանձնարարությունների տրամադրում,
- Յուրաքանչյուր շաբաթ 1 խմբային առցանց գնահատվող դաս․
- Ավարտական հանձնարարություն՝ բոլոր դասընթացներից գիտելիքների պրակտիկ հարցադրումների միջոցով:
ՀօԹ ուղեկցի պարտականությունները
Առաջնորդության նախագծի մեկնարկին ընդառաջ ընտրված ՀոԹ ուղեկիցը ստանում է onboarding թրեյնինգ, ուղեցույցներ, և կցվում է 12 խմբերից որևիցէ մեկին:Այնուհետև նա սկսում է 5 շաբաթների ընթացքում կազմակերպել և համակարգել այդ խմբի հետ շաբաթական 2 խմբային առցանց դաս՝ խթանելով խմբակիցների հավասար մասնակցությունը, կոորդինացնելով իր խմբի չատը, լրացնելով խմբակիցներից յուրաքանչյուրի մասին ակտիվության գնահատման թերթիկը:
Պարտականությունները նաև ներառում են՝
- խմբակիցներին վերջնաժամկետների մասին հիշեցումների և դասընթացների հետ կապված նորությունների փոխանցումը խմբային չաթում
- անհրաժեշտության դեպքում կապի հաստատում հեռախոսազանգի միջոցով,
- տեխնիկական/բովանդակային/վարքային խնդիրների վերհանում և տեղեկացում ՀօԹ թիմին, և հետադարձ կապի պահպանում շարունակական բարելավման նպատակով:
ՀօԹ ուղեկցի հոնորար
Յուրաքանչյուր նախագծի (5 շաբաթյա ծրագրի համար) ուղեկիցները կստանան հոնորար՝ մինչև 52,500 դրամի չափով։ Հիմնական (երաշխավորված) վարձատրություն՝ 35,000 դրամ, արդյունավետության բոնուս՝ 17,500 դրամի չափով, ըստ կատարողականի):Այս տարի գարնանը և ամռանը հնարավոր է լինել ՀօԹ ուղեկից հաջորդաբար երեք անգամ (3 նախագիծ), ընդհանուր վաստակելով մինչև 157,500 դրամ: Հնարավոր է միաժամանակ հանդիսանալ ուղեկից 2 խմբի համար՝ ստանալով կրկնակի հոնորար:
Բոլոր նշված գումարները ներառում են հարկերը։
Ուղեկցի հետ կնքվում է ծառայությունների մատուցման պայմանագիր և վճարումը կատարվում է յուրաքանչյուր նախագծի իրականացումից հետո՝ 1-2 աշխատանքային օրվա ընթացքում: