StartHoT!Ձեր գաղափարը՝ պատրաստ թռիչքի

Ձեռներեցության գրագիտություն + Բիզնես հոգեբանություն

6 շաբաթ · սեպտեմբերի 28 – նոյեմբերի 8։ Բիզնես մոդել կանվաս և պատրաստի ներկայացում։

StartHoT! մենթորական ծրագիր

8 շաբաթ · 5 թռիչք · անհատական մենթորություն՝ գաղափարը լրամշակելու, պրոդուկտը զարգացնելու, կամ բիզնեսը մեկնարկելու համար։

GrowHoT! ֆինանսավորում

500 հազ – 1,5 մլն ֏ դրամաշնորհ և փորձագետի աջակցություն՝ 10,5 մլն դրամ ընդհանուր ֆոնդով։

Ձեռներեցության գրագիտություն

Գաղափարի ձևակերպում, գնահատում և վավերացում՝ հաճախորդ և շուկա, բիզնես մոդել կանվաս, ֆինանսներ և ծախսեր, մարքեթինգ և վաճառք, թիմ և գործընկերներ, գաղափարի ներկայացում։

Բիզնես հոգեբանություն

Ղեկավարի հոգեբանական առաստաղ և ինքնասաբոտաժ, սահմանափակող համոզմունքներ, էմոցիաների և ճանաչողական աղավաղումների ազդեցությունը որոշումների վրա, վստահության և պատասխանատվության վրա հիմնված թիմ։

Անհատական, համակարգված մենթորություն

StartHoT!-ը ՀօԹ Ակադեմիայի Բիզնես Ինկուբատորի հաջորդ փուլն է՝ 8-շաբաթյա ինտենսիվ գործնական մենթորական ծրագիր, որը կազմված է 5 փոխկապակցված մոդուլներից՝ «թռիչքներից»։ Ամեն թռիչք բիզնես գաղափարի զարգացման առանձին փուլ է՝ հստակ նպատակներով, գործնական առաջադրանքներով և ակնկալվող արդյունքներով։

Ծրագրին կմասնակցի 30 ընտրված մասնակից, որոնք փորձառու մենթորների հետ կաշխատեն իրենց բիզնես գաղափարը լրամշակելու, պրոդուկտը զարգացնելու և բիզնեսը մեկնարկելու վրա, ինչպես նաև կպատրաստվեն GrowHoT! դրամաշնորհային ծրագրին։

Ի՞նչ եք ստանալու

• Անհատական մենթորական հանդիպումներ՝ Ձեր գաղափարի կոնկրետ հարցերի և հաջորդ քայլերի շուրջ
• Խմբային հանդիպումներ և գործնական առաջադրանքներ
• Ֆինանսական և իրավական գրագիտություն՝ բիզնեսի ձևակերպում, հաշվապահության հիմունքներ, դրամաշնորհի հաշվետվողականություն
• Անհատական հետադարձ կապ յուրաքանչյուր թռիչքի ավարտին
• Աջակցություն վերջնական ներկայացման պատրաստման հարցում
• GrowHoT! դրամաշնորհին դիմելու հնարավորություն
• Ծրագրի ավարտական վկայական

• Յուրաքանչյուր թռիչքի համար փորձառու մենթոր
• Տեխնիկական աջակիցներ՝ հանդիպումների կազմակերպում, ամրագրման գործիքներ, հետևում ժամկետներին
• Ուսումնական նյութեր, ձևանմուշներ և միասնական աշխատանքային հարթակ
• Անհատական հետադարձ կապ յուրաքանչյուր թռիչքի վայրէջքին

• Ձեր հասանելիությունը հանդիպումներին՝ ըստ մենթորների առաջարկած ժամերի
• Ժամանակ՝ հետազոտությունների, նյութերի ուսումնասիրության և առաջադրանքների համար
• Առաջադրանքների ներկայացում ժամանակին
• Առկա մասնակցություն հունվարի 12–13-ին և 23-ին Երևանում

Հանդիպումների ժամերը կառուցվում են մենթորների հասանելիության շուրջ

Կոնկրետ օրերն ու ժամերը համաձայնեցվում են մենթորների հետ՝ առաջնահերթ հաշվի առնելով նրանց առաջարկած ժամանակային միջակայքերը։ Հանդիպումները կարող են անցկացվել ինչպես աշխատանքային, այնպես էլ ոչ աշխատանքային օրերին։ Մասնակիցների հասանելիությունը հաշվի է առնվում հնարավորության սահմաններում, ուստի դիմելուց առաջ համոզվեք, որ կարող եք այս 8 շաբաթներին ճկուն կերպով ժամանակ տրամադրել։ Բաց թողնված հանդիպումները կամ ուշացած առաջադրանքները կարող են հանգեցնել Վիզայի մերժման։

Նշված ժամաքանակները նախնական պլանավորման ցուցանիշներ են։ Գրաֆիկի փոփոխությունների մասին ՀօԹ Ակադեմիան կտեղեկացնի նախապես։ Բոլոր առցանց հանդիպումները տեսաձայնագրվում են։

Բիզնես Ինկուբատոր 2026/27-ի մասնակիցներ, ովքեր ստացել են՝

• 1ավարտական վկայական «Ձեռներեցության գրագիտություն» մոդուլից
• 2առնվազն մասնակցության հավաստագիր «Բիզնես հոգեբանություն» մոդուլից

• Մեկ թիմից ընդունվում է մեկ հայտ։
• Թիմի առնվազն մեկ անդամ պետք է բավարարի մասնակցության պայմաններին։
• Դիմումը լրացնում է թիմի մեկ հիմնական պատասխանատու անձը, ով կմասնակցի հանդիպումներին և կկատարի առաջադրանքները։ Մյուս անդամները առանձին դիմում չեն ներկայացնում։

Մոտիվացիոն նամակ

Ով եք Դուք, ինչ փորձ ունեք, որն է Ձեր բիզնես գաղափարը, ինչու եք ուզում մասնակցել, ինչի եք ուզում հասնել և ինչու եք Ձեզ համարում պատրաստ հաջորդ փուլին։ Թիմերը ներկայացնում են նաև յուրաքանչյուր անդամի դերը և ով կմասնակցի հանդիպումներին։

Բիզնես մոդելի պատկեր

Ձեռներեցության գրագիտության մոդուլի ձևանմուշով պատրաստված Բիզնես մոդելի պատկերը՝ ավարտական աշխատանքի տարբերակը կամ դրա բարելավված տարբերակը։

Վիդեոներկայացում

Ավարտական աշխատանքի ներկայացումը կամ դրա բարելավված տարբերակը՝ վիդեոուղեկցությամբ։ Պրոֆեսիոնալ տեխնիկա պետք չէ, բավական է հեռախոսը։

Հոգեբանական հարցաշար

Կարճ հարցաշար, որը լրացնում եք դիմումի ձևի համապատասխան բաժնում։

Ժամանակացույցի և հասանելիության հաստատում

Հաստատում եք, որ ուսումնասիրել եք ժամանակացույցն ու ծանրաբեռնվածությունը և ընտրվելու դեպքում պատրաստ եք մասնակցել հանդիպումներին ու կատարել առաջադրանքները։

Համաձայնություններ

Պատրաստակամություն ստորագրելու գաղտնիության համաձայնագիր (NDA), տեղեկացվածություն առցանց հանդիպումների տեսաձայնագրման մասին և GrowHoT!-ի նկատմամբ հետաքրքրության նշում։

Ուշացած կամ թերի դիմումները չեն դիտարկվի։ Ստուգեք, որ կցված ֆայլերն ու հղումները հասանելի են։

Նախնական ֆիլտրացիա

Ստուգվում են փաթեթի ամբողջականությունը և մասնակցության պայմանները։

Փորձագիտական գնահատում

GrowHoT!՝ դրամաշնորհային ծրագիր 2027

GrowHoT!-ը Բիզնես ինկուբատորի եզրափակիչ փուլն է։ Առավելագույնը 7 բիզնես գաղափար կստանա դրամաշնորհ՝ ընդհանուր 10,500,000 դրամ ֆոնդից՝ նոր բիզնեսը կամ գործող բիզնեսում նոր պրոդուկտը կամ ծառայությունը կյանքի կոչելու համար, ինչպես նաև անհատական աջակցություն ուղեկից փորձագետի կողմից 2027թ.-ի ընթացքում։

Այս ամփոփագիրը տեղեկատվական է։ Այն ներկայացնում է GrowHoT!-ի հիմնական պայմանները, որպեսզի դեռ StartHoT!-ի ընթացքում բիզնես գաղափարն ու բյուջեն կառուցվեն դրանց շուրջ։ Պայմաններին ծանոթանալը չի պարտավորեցնում դիմել GrowHoT!-ին, իսկ StartHoT!-ի ավարտը դրամաշնորհ չի երաշխավորում։

Ով կարող է դիմել

• StartHoT!-ի բոլոր 5 Թռիչքների Վիզաները ստացած մասնակիցները։
• Թիմով դիմելու դեպքում թիմը ներկայացնում է իր անդամներից մեկին՝ դիմողին, որը պետք է ստացած լինի բոլոր 5 Վիզաները և լինի այն տնտեսական միավորի հիմնադիրը կամ համահիմնադիրը, որը կստանա դրամաշնորհը։
• ՀՀ օրենքով որոշ անձինք (օրինակ՝ հանրային ծառայողներ, զինծառայողներ) չեն կարող իրականացնել ձեռնարկատիրական գործունեություն կամ ստանալ դրամաշնորհ։

Դրամաշնորհի հիմնական կանոնները

• Տնտեսական միավոր. դրամաշնորհը տրվում է միայն դիմողի անունով ԱՁ-ին կամ այն ՍՊԸ-ին, որտեղ դիմողը հիմնադիր է։ Պայմանագիրը կնքվում է միայն տնտեսական միավորի հետ․ եթե այն չունեք, պետք է պատրաստ լինել գրանցել այն և բանկային հաշիվ բացել դրական որոշումից անմիջապես հետո՝ մինչև հունվարի 22-ը։
• Առանձին բանկային հաշիվ. դրամաշնորհը փոխանցվում է միայն դրա համար առանձնացված հաշվին։
• Միայն անկանխիկ և ինվոյսներով. բոլոր ծախսերը կատարվում են բանկային փոխանցումով՝ դիմողի տնտեսական միավորի անունով դուրս գրված ինվոյսի (հաշիվ-ապրանքագրի) հիման վրա։ Կանխիկ և անձնական քարտով վճարումները չեն ընդունվում։ Աշխատակիցների և ծառայությունների վճարումները պետք է հիմնավորված լինեն պայմանագրերով և ակտերով։
• Միայն հաստատված պլանով. դրամաշնորհը ծախսվում է միայն պայմանագրին կցված իրականացման և ֆինանսական պլանի համաձայն։

Ինչ կարելի է պատրաստել արդեն հիմա

• Մտածել՝ ԱՁ, թե ՍՊԸ։ StartHoT!-ի Թռիչք 4-ում կօգնենք հասկանալ տարբերությունները, գրանցման քայլերն ու անհրաժեշտ փաստաթղթերը։ Գրանցումը պահանջվում է միայն դրական որոշումից հետո։
• Գտնել մատակարարներ, որոնք կարող են տրամադրել ինվոյս (հաշիվ-ապրանքագիր), և հավաքել գնային առաջարկներ հիմնական գնումների համար։
• Գտնել հաշվապահ կամ հաշվապահական ծառայություն մատուցող կազմակերպություն․ դրամաշնորհ ստանալու դեպքում այն անհրաժեշտ կլինի ինվոյսների, հաշվետվությունների և հարկերի համար։ Այս հարցերը կներկայացվեն նաև StartHoT!-ի Թռիչք 4-ում։