Հաճախ Տրվող Հարցեր. GrowHoT! Դրամաշնորհային ծրագիր
Այստեղ ներկայացված են GrowHoT! Դրամաշնորհային ծրագրին դիմելու և դրական որոշման պարագայում դրամաշնորհ ստանալուց ծրագրում մասնակցության մի քանի կարևոր թեմաների շուրջ հաճախ տրվող հարցերն ու պատասխանները։
Այս ՀՏՀ-ն միտված է օգնել StratHoT! Մենթորության ծրագրի մասնակիցներին ճիշտ կողմնորոշվել և նախապատրաստվել GrowHoT! Դրամաշնորհային ծրագրին։
ՀՏՀ-ն ներառում է հետևյալ չորս հիմնական թեմաների շուրջ խմբավորված հարցերը.
Դրամաշնորհային ծրագրի դիմում, պայմանագիր և իրավական հարցեր
Դրամաշնորհի գումար, գումարի օգտագործում և այլ ֆինանսական հարցեր
Բիզնես գաղափարի իրականացման պլան, հիմնական նշանակետեր, և հաշվետվողականություն
Դրամաշնորհ ստանալու պարագայում HoT Ակադեմիայի հետ հետագա համագործակցություն
Երեք փուլերից բաղկացած բիզնես ինկուբատորը տրամադրում է մասնակիցներին (HoT Բիզնես Ճամփորդներին), հնարավորություն անհատապես աշխատելու բիզնես ոլորտի գուրուների հետ, որոնք ուղղորդում և աջակցում են՝ դառնալով նրանց մենթորները, սովորեցնում են՝ ինչպես ներկայանալ նոր շուկաներում, ինչպես ներգրավել գործընկերներ և ի վերջո ինչպես հասնել բիզնես նպատակակետին։ Լավագույն HoT Բիզնես Ճամփորդները հնարավորություն են նաև ստանում վաստակելու դրամաշնորհ՝ իրենց բիզնես գաղափարների իրականացման համար, ինչպես նաև անվճար օգտվելու բիզնես ծառայությունների և պրոդուկտների առաջխաղացմանը նպաստող HoT Ակադեմիայի գործընկերային ցանցից (օր. վաճառքի պլատֆորմներ) և վաճառքի ժամանակակից գործիքներին տիրապետող երիտասարդ մասնագետների օժանդակությունից։
GrowHoT! Դրամաշնորհային ծրագրի պայմանագրի նմուշ
ՀԱՃԱԽ ՏՐՎՈՂ ՀԱՐՑԵՐ
Դրամաշնորհային ծրագրի դիմում, պայմանագիր և իրավական հարցեր
Ո՞վ կարող է դիմել GrowHoT! Դրամաշնորհային ծրագրին
GrowHoT! Դրամաշնորհային ծրագրին կարող են դիմել միայն StartHoT! Մենթորության ծրագրի բոլոր հինգ Թռիչքները հաջողությամբ հաղթահարած բոլոր այն HoT Բիզնես ճամփորդները, ովքեր ծանոթացել են ծրագրի դիմումի և դրամաշնորհային պայմանագրի մանրամասներին և համաձայն են պայմանների հետ։
Ինչպե՞ս պետք է դիմել GrowHoT! Դրամաշնորհային ծրագրին
Հարկավոր է պատրաստել և ներկայացնել GrowHoT! Դրամաշնորհային ծրագրի դիմումի փաթեթ, որն իր մեջ ներառում է՝
Բիզնես գաղափարի ներկայացման համար լրացված վերջնական Pitch Deck-ը,
Բուն ձեր գաղափարի ներկայացման կարճ տեսաձայնագրությունը ըստ Pitch Deck-ի,
Հուլիսից դեկտեմբեր ժամանակահատվածի համար բիզնես գաղափարի իրականացման պլանը և ֆինանսական ծախսերի պլանը,
Ամփոփված ֆինանսական մոդելների երկու տարբերակները (դրամաշնորհով և առանց դրամաշնորհի),
Տնտեսական միավոր ստեղծելու համար անհրաժեշտ քայլերի պատկերացումը և պատրաստակամությունը կամ առկա տնտեսական միավորի փաստաթղթերի փաթեթը,
Այլ տեղեկատվություն ըստ անհրաժեշտության։
Ե՞րբ է GrowHot! Դրամաշնորհային ծրագրին դիմելու վերջնաժամկետը
GrowHoT! Դրամաշնորհային ծրագրին կարող եք դիմել Թռիչք 5-ի Տրանսֆորմացիայի փուլի ձեր վերջին անհատական հանդիպումից սկսած մինչև Վայրէջքի հանդիպումը ներառյալ, երբ պատրաստ կունենաք Դրամաշնորհային ծրագրի դիմումի փաթեթը և վստահ կլինեք, որ Թռիչք 5-ը հաջողությամբ ավարտում եք։
Արդյո՞ք պետք է ունենալ գրանցված տնտեսական միավոր GrowHot! Դրամաշնորհային ծրագրին դիմելու պահին և HoT Ակադեմիայի կողմից դրամաշնորհ ստանալու համար
Դրամաշնորհին դիմելիս տնտեսական միավորի առկայությունը պարտադիր չէ, սակայն Դրամաշնորհի ստացման դրական որոշման մասին HoT Ակադեմիայի կողմից տեղեկանալուց հետո 1 շաբաթվա ընթացքում մասնակիցները պետք է ձևակերպեն իրենց անունով տնտեսական միավորը (եթե այն առկա չէ), որպեսզի կարողանան ստորագրել դրամաշնորհի պայմանագիրը և ստանալ գումարը բանկային փոխանցման տարբերակով: Դրամաշնորհ ստացող ցանկացած Բիզնես Ճամփորդ պետք է պայմանագիր կնքի «Զարգացման սկզբունքներ» ՀԿ-ի հետ՝ որպես տնտեսական միավոր, օրինակ՝ ԱՁ, կամ ՍՊԸ-ի հիմնադիր կամ համահիմնադիր:
Արդյո՞ք տնտեսական միավորը հարկավոր է գրանցված լինի StartHoT! Մենթորության ծրագրին դիմած մասնակցի անունով
Միայն StartHoT! Մենթորության ծրագրի մասնակիցները հնարավորություն ունեն դիմելու GrowHoT! Դրամաշնորհային ծրագրին և մասնակցելու դրամաշնորհային ներկայացման փուլին։ Դրամաշնորհի ստացման մասին դրական որոշման պարագայում դրամաշնորհի պայմանագիրը կարող է կնքվել միայն StartHoT! Մենթորության ծրագրի մասնակիցի անունով։
* Խիստ սահմանափակումների պարագայում հատուկ դեպքերը կքննարկվեն անհատական և կկայացվի համապատասխան որոշում։
Արդյո՞ք պետք է ունենալ բիզնես գաղափարի իրականացման համար պահանջվող բոլոր լիցենզիաները և պաշտոնական թույլտվությունները նախքան դրամաշնորհի դիմելը կամ դրամաշնորհ ստանալու համար
Ոչ, դուք կարող եք դիմել և ստանալ դրամաշնորհ՝ առանց լիցենզիաների առկայության։ GrowHoT! Ծրագիրն ուղղված է աջակցելու հյուրընկալության ոլորտում նոր բիզնես գաղափարներին և սկսնակ փոքր բիզնեսներին՝ իրենց զարգացման վաղ փուլում։ Այսպիսով, ենթադրում ենք, որ այս փուլում դուք դեռևս չունեք անհրաժեշտ բոլոր փաստաթղթերը, սակայն, ակնկալում ենք, որ դուք պլանավորում եք առաջիկայում ստանալ բոլոր անհրաժեշտ լիցենզիաներն ու պաշտոնական թույլտվություններն և գործել ՀՀ օրենսդրության պահանջներին համապատասխան։ HoT Ակադեմիայի համար ընդունելի է, եթե անհրաժեշտ լիցենզիաների ստացումը ներառված լինի ձեր առաջիկա գործողությունների պլանում և դրամաշնորհը ստանալու պահին փաթեթը դեռ առկա չլինի։
Արդյո՞ք տարածքի սեփականատերը պետք է լինի ծրագրին դիմած մասնակիցը
Ոչ, պարտադիր չէ, որ տարածքի սեփականատերը լինի ծրագրին դիմած մասնակիցը։ Տարածքը կարող է պատկանել դիմորդի ընտանիքի անդամներին կամ վարձակալվել։ Եթե տարածքի վերանորոգման աշխատանքները ներառվում են դրամաշնորհի գումարի օգտագործման պլանում, ապա մեզ համար կարևոր է, որ տարածքը լինի ձեր երկարաժամկետ օգտագործման տիրապետության տակ։
Ո՞վ պետք է ստորագրի Պայմանագիրը, եթե ծրագրում ներառված են մեկից ավել գործընկերներ
Պայմանագիրը պետք է ստորագրի տնտեսական միավորի Պաշտոնական ներկայացուցիչը՝ կամ Անհատ Ձեռնարկատերը, կամ ՍՊԸ-ի հիմնական բաժնետերը, համահիմնադիրը, ով հանդիսանում է StartHoT! Մենթորության ծրագրի հիմնական մասնակից։
Ինչպե՞ս է խորհրդատվություն և աջակցություն տրամադրում HoT Ակադեմիան ծրագրի մասնակիցներին իրավական հարցեր ծագելու պարագայում:
Հարցերի առկայության դեպքում մասնակիցները կարող են ուղղել իրենց հարցերը համապատասխան մասնագետներին Ծրագրային թիմի միջոցով՝ էլ. նամակով կամ հեռախոսազանգով։ Հարցերի շրջանակը սահմանափակվում է դրամաշնորհի պայմանագրի կամ տնտեսական միավոր ստեղծելու հետ կապված հարցերով, որոնց պատասխանները ծրագրի մասնակիցները ինքնուրույն չեն կարողանում գտնել։
Արդյո՞ք ֆիքսված է Բիզնես Ճամփորդին տրամադրվող դրամաշնորհի չափը և դրամաշնորհներ ստացողների քանակը։
Առկա են նախնական սահմանված երկու դրամաշնորհի գումարի չափ և շահառուների քանակ. 12 շահառու, ով կարող է ստանալ 1.500.000 և 5 շահառու՝ 500.000 ՀՀ դրամի չափով դրամաշնորհ։ Սակայն Դրամաշնորհի գումարների չափերը, ինչպես նաև ստացողների քանակը, կարող են տատանվել կախված մասնակիցների ներկայացումների ընդհանուր պատկերից, ֆինանսական մոդելների ցուցանիշներից, բիզնես գաղափարի իրականացման և ծախսերի պլանների իրատեսականությունից, գումարի օգտագործման նպատակներից և դրամաշնորհի առկայության պարագայում բիզնեսի վրա ակնկալվող ազդեցությունից։
Ի՞նչ ծախսեր է հնարավոր ծածկել դրամաշնորհի գումարով և արդյո՞ք կան ծախսեր որոնք հնարավոր չէ ընդգրկել:
HoT Ակադեմիայն չի ներկայացնում որևէ սահմանափակում, թե ինչ տեսակի ծախսերի պետք է ուղղվի Դրամաշնորհի գումարը, սակայն պետք է նշենք, որ մեր նպատակն է, որ Դրամաշնորհը ծառայի որպես բիզնեսի զարգացումն ապահովող, հիմնավորված երկարաժամկետ ազդեցությամբ ներդրում։ Հաշվի առնելով, որ Դրամաշնորհի ներկայացումը մրցակցային է, մենք նախապատվություն կտանք այն դիմորդներին, ում բիզնեսի իրականացման պլանն ու Դրամաշնորհի գումարով իրականացվող ֆինանսական ծախսերի պլանը համարենք առավել երկարաժամկետ ազդեցություն ունեցող ներդրում։
Արդյո՞ք հնարավոր է դրամաշնորհով տրամադրվող գումարի չափի փոփոխություն կամ վերահաշվարկ ծրագրի ընթացքում։
Ոչ, ծրագրի ընթացքում դրամաշնորհի գումարի փոփոխության կամ վերահաշվարկի ենթակա չէ։ Կարևոր է՝ հավատարիմ մնալ Փիչինգին ներկայացրած և պայմանագրով հաստատված բիզնես գաղափարի իրականացման գործողությունների պլանին և ֆինանսկան ծախսերի պլանին։
Ի՞նչ անել, եթե, ըստ իմ բիզնես իրականացման պլանի նախատեսում եմ դրամաշնորհի գումարը ծախսել 2024 թվականի դեկտեմբերից ավելի ուշ:
HoT Ակադեմիայի ծրագիրը գործում է մինչև 2025-ի փետրվար, հետևաբար ծրագրի շրջանակում տրամադրվող ցանկացած դրամաշնորհ կամ համագործակցություն պետք է իրականացված լինի մինչև նշված ժամկետները։ Դրամաշնորհային փաթեթի դիմում ներկայացնելիս մենք ուշադրություն ենք դարձնելու ձեր կողմից ներկայացված ժամկետներին, որպեսզի բիզնեսի զարգացմանն ուղղված հստակ քայներ և դրամաշնորհի գումարի ծախսերի իրականացումը տեղի ունենա մինչև դեկտեմբերի վերջ, այլապես դրամաշնորհի տրամադրումը կարող է մերժվել։ Նշենք, որ այստեղ բիզնես մեկնարկի մասին չէ խոսքը, այլ հստակ քայլերի և դրամաշնորհի գումարի նպատակային օգտագործման մասին՝ նշված ժամկետներում։
Արդյո՞ք պետք է բացել տնտեսական միավորին կից բիզնես բանկային հաշիվ, թե փոխանցումը կարող է իրականացվել իմ անձնական հաշվեհամարին։
Այո, դրամաշնորհ ստանալու պարագայում գումարը կարող է փոխանցվել միայն HoT Բիզնես Ճամնփորդի անվամբ տնտեսական միավորին կից գործող բանկային հաշվեհամարին։ Ֆիզիկական անձանց բանկային հաշվեհամարներին որևէ փոխանցում չի կարող իրականացվել։
Կա՞ բանկային գործընկեր, որի հետ համագործակցում է HoT Ակադեմիան, որտեղ հարկավոր է ունենալ բանկային հաշվեհամար դրամաշնորհի ստացման համար։
Ոչ, դրամաշնորհը կարող է փոխանցվել ցանկացած ՀՀ բանկում գրանցված բիզնեսի հաշվեհամարին, որը կցված է համապատասխան տնտեսական միավորին։
Ի՞նչ կերպով է տրամադրվելու դրամաշնորհը՝ միանվագ, թե փուլային։
Փոխանցման ձևաչափը կախված է բիզնես գաղափարի իրականացման խոստացված պլանի իրատեսականությունից և բովանդակությունից: Գնահատող հանձնաժողովը կարող է առաջարկել կատարել միանվագ փոխանցում կամ նպատակահարմար գտնել դիտարկել դրամաշնորհի գումարի մասնաբաժիններով փոխանցումը։
Ի՞նչ անել այն դեպքում, եթե GrowHoT!-ի մեկնարկից հետո փոխվում է բիզնես գաղափարը կամ բիզնես գաղափարի ուղղվածությունը
HoT Ակադեմիայի Բիզնես Ինկուբատոր ծրագիրը նախագծված է եղել այնպես, որ մեծ ուշադրություն ու շեշտ դնի կրթական կոմպոնենտի՝ StartHoT! Մենթորության ծրագրի վրա, նախքան դրամաշնորհային կոմպոնենտի անցնելը և բիզնես գաղափարների իրականացման համար գումար տրամադրելը։ Մենթորության ծրագրի ընթացքը նախատեսված է եղել մասնակիցների բուն բիզնես գաղափարի հղկման ու լրամշակմանը, որը պետք է թույլ տա դիմել Դրամաշնորհային ծրագրի արդեն իսկ հստակեցված պրոդուկտով կամ ծառայությամբ։ Դրամաշնորհ ստանալուց հետո բիզնես գաղափարի փոփոխությունը մեզ համար անընդունելի տարբերակ է։
Ի՞նչ անել, եթե դրամաշնորհ ստանալուց հետո բիզնես գաղափարի իրականացման պլանի կամ դրամաշնորհային միջոցների օգտագործման պլանի մեջ լինի փոփոխությունների կարիք, հանդիպենք հարցերի կամ դժվարությունների
Մենք նախապես խնդրում ենք յուրաքանչյուր մասնակցի կազմել վեց ամսվա համար մտածված, իրագործելի և լավ պլանավորված բիզնեսի իրականացման պլան և պլանավորել ծախսերը, ինչպես նաև տրամադրում ենք հետադարձ կապ կազմած պլանի վերաբերյալ։ Սա արվում է նվազեցնելու պլանի իրականացման ընթացքում շեղումների ռիսկերը։
Այնուամենայնիվ, հասկանում ենք, որ հնարավոր են արտաքին գործոնների ազդեցության տակ որոշակի խնդիրներ կամ փոփոխությունների կարիք առաջանա։ Խնդիրների առաջացման պարագայում, մենք ակնկալում ենք, որ դուք ինքնուրույն կփորձեք լուծել այդ խնդիրները և անել ձեր ուժերի սահմաններում ամեն ինչ ձեր բիզնես գաղափարը կյանքի կոչելու համար։ Ինչպես նաև ակնկալում ենք, որ հնարավոր հարցերի կամ դժվարությունների դեպքում կապ կհաստատեք HoT Ակադեմիայի թիմի հետ՝ տեղեկացնելու և քննարկելու ռիսկերի կանխարգելման տարբերակները։ Կարևոր է տեղեկացնել ակնկալվող խնդիրների կամ ժամանակացույցից հնարավոր շեղումների մասին հաշվետվություն ներկայացնելու ժամկետից առաջ։ Քննարկման արդյունքում հնարավոր է կարիք լինի ադապտացնել գործողությունների պլանը հուլիսից - դեկտեմբեր ամիսների համար։
Համարում ենք, որ նման դեպքերը պետք է լինեն բացառությունների շրջանակում, և ոչ սովորական երևույթ ու պայմանավորված լինել ձեր ազդեցության շրջանակներից դուրս գտնվող արտաքին գործոններով։
Ինչ տեսակի (ձևաչափ ու բովանդակություն) հաշվետվություններ պետք է տրամադրել HoT Ակադեմիային և ինչ հաճախականությամբ։
Հաշվետվությունները նախատեսվում են երկու տեսակի. 1) բիզնեսի զարգացման և 2) ֆինանսական հաշվետվություններ։ Երկու հաշվետվությունների ձևաչափը, օրինակն ու ներկայացման ժամանակացույցը կտրամադրվի դրամաշնորհ ստացած մասնակիցների հուլիսի ամսվա ընթացքում։
Հիմնականում բիզնեսի զարգացման (1) հաշվետվությունները պետք է ներառեն.
ձեր կողմից ներկայացված բիզնեսի իրականացման պլանի վերաբերյալ կարգավիճակի թարմացումներ,
ձեր բիզնեսի ընդհանուր ձեռքբերումների, դժվարությունների, վաճառքների, համագործակցությունների մասին նորություններ, և
այլ կարևոր ցուցանիշների մասին թարմացումները։
Հաշվետվությունները պետք է ներառեն ձեր բիզնես գաղափարի իրականացման պլանի ֆայլը մեկնաբանություններով, ընդհանուր պատմողական նկարագրություն ներկայիս կարգավիճակի մասին, ինչպես նաև անհրաժեշտության դեպքում հնարավոր է պահանջվեն նկարներ կամ տեսաձայնագրություններ։
Արդյո՞ք անհրաժեշտ է տրամադրել նաև ֆինանսական հաշվետվություն դրամաշնորհի գումարի օգտագործման վերաբերյալ։
Այո, ֆինանսական հաշվետվություն նույնպես պահանջվում է, ինչպես նշված է պայմանագրում։ Հաշվետվության ձևաչափը և անհարեշտ փաստաթղթերի մասին տեղեկատվությունը կտրամադրվի դրամաշնոր ստացած մասնակիցներին հուլիս ամսվա ընթացքում։
Ի՞նչ փաստաթղթեր կամ ապացույցներ պետք է կցվեն դրամաշնորհային միջոցների օգտագործման հաշվետվություններին
Հաշվետվությունների համար անհրաժեշտ փաստաթղթերի ու ապացույցների ցանկը կտրամադրվի մասնակիցներին հուլիս ամսվա ընթացքում։ Այս փուլում ցանկանում ենք տեղեկացնել, որ կարիք կլինի պահպանել գնումների սկզբնական փաստաթղթերը` կտրոններն ու հաշիվ ապրանքագրերը։ Առանց կտրոնների ծախսերի համար կնախատեսվի հաշվետվության այլ ձևաչափ։
Հնարավո՞ր է արդյոք օբյեկտիվ հանգամանքների դեպքում ստանալ հաշվետվություններ ներկայացնելու լրացուցիչ ժամանակ
Եթե որևէ օբյեկտիվ պատճառներով հաշվետվության տրամադրման ժամանակցույցից շեղում է տեղի ունենում, խնդրում ենք հեռախոսազանգող և էլ. նամակով նախապես տեղյակ պահել Ծրագրի թիմին այդ մասին և բացատրել պատճառն ու պայմանավորվել հաշվետվությունների տրամադրման ժամկետի մասին։
Ինչպե՞ս է իրականացվելու հետագա մոնիթորինգը
Դրամաշնորհի ստացման պարագայում, HoT Ակադեմիան, մինչև 2025 թվականի փետրվար ամիսը շարունակական կապ է ապահովելու HoT Բիզնես Ճամփորդների հետ, դիմելու է որոշակի հարցերով, իրականացնելու է այցեր, ուշադրություն է դարձնելու իրականացման պլանի կատարմանը, անհրաժեշտության դեպքում խնդրելու է կիսվել հաջողության պատմություններով և այլն։ Հիմնականում մոնիթորինգն իրականացվելու է հեռախոսազանգերի, տեսազանգերի և այցելությունների, ինչպես նաև հաշվետվությունների պարբերական տրամադրման միջոցով։
Հետագա համագործակցության ի՞նչ հնարավորություններ կան ծրագրի մասնակիցների համար մինչև ծրագրի ավարտը:
HoT Բիզնես Ճամփորդները հնարավորություն կունենան համագործակցելու HoT Ակադեմիայի կողմից իրականացվող կրթական այլ նախաձեռնությունների և ծրագրերի շրջանակում։ Հնարավորությունների մասին մասնակիցները կտեղեկացվեն էլ. նամակով կամ հեռախոսազանգով։
Ի՞նչ աջակցություն և խորհրդատվություն կարող է տրամադրվել դրամաշնորհ ստացած մասնակիցներին:
Մենք նախատեսում ենք տրամադրել որոշակի աջակցություն մարքեթինգային դաշտում՝ ձեր պրոդուկտների և ծառայությունների առաջխաղացման և վաճառքների ապահովման գործում։ Աջակցության մանրամասները կքննարկվեն դրամաշնորհ ստացած մասնակիցների հետ։
Հնարավո՞ր է արդյոք լրացուցիչ ռեսուրսներ կամ ֆինանսավորում ստանալ՝ GrowHoT! ծրագրի ավարտից հետո:
Ոչ, տվյալ ծրագրի շրջանակում ի սկզբանե նախատեսված դրամաշնորհից դուրս լրացուցիչ ֆինանսական միջոցներ հասանելի չեն լինի:
Արդյո՞ք կձեռնարկվեն միջոցներ ծրագրի ավարտից հետո մասնակիցների հետ կապը պահպանելու համար:
HoT Ակադեմիան շարունակական կապ է ապահովելու մասնակիցների հետ և հետևելու Ձեր հետագա զարգացմանը։ Հաշվի առնելով, որ HoT Ակադեմիան կարող է կրել շարոնակական բնույթ, մեր հետագա ծրագրերի և համագործակցության հնարավորությունների մասին այս փուլի ծրագրի մասնակիցները կտեղեկացվեն և կներառվեն հետագա միջոցառումների շրջանակում ըստ անհրաժեշության ու ցանկության։ Մեր դիրքորոշումը հետևյալն է. մեր ծրագրի բոլոր մասնակիցներին ընկալում ենք որպես HoT Համայնքի անդամ և կարող ենք նախապատվություն տալ նրանց մեր այլ ծրագրերի մասնակցության մեջ, եթե բուն բովանդակային համապատասխանելիությունը առկա է։
Արդյոք մասնակիցները կտեղեկացվեն հետագա HoT ծրագրերի մասին և հնարավորություն կստանան համագործակցել HoT համայնքի հետ։
Մասնակիցները կտեղեկացվեն HoT Ակադեմիայի հետագա բոլոր ծրագրերի և միջոցառումների մասին էլ. նամակով, հեռախոսազանգով և մեր սոցցանցերի միջոցով, և ցանկության դեպքում հնարավորություն կունենան մասնակցելու։